قــــاريــة لــمــــين
بيسألونى ...قارية لمين
قولت ليه السؤال
قالوا شعرك جميل وحزين
ويتعمل موال
قولت قاريه فى بحور السنين
وأبويا كان رحال
وكنت جاريه فى قصور الأنين
وإتعلمت المحال
وبيسألونى قارية لمين
أنا قارية العرق فى وشوش الفلاحين
أنا عزم الرجال
أنا الحجر فى بيوت الفراعين
أنا المنجل والمنوال
أنا السطور فى تاريخ العرب
أنا المصريه
أنا الشط اللى عمره ماشرب
غير الحريه
أنا البردى إللى عليه إنكتب
تاريخ البشرية
أنا الحبر اللى خطط وكتب
حدوته مصرية
أنا الأزهر والجامعه والأدب
أنا العربيه
وبيسألونى قاريه لمين
قولت قاريه فى عيون المصريين
وجع وأنين
وبياعه وشاريه فى أسواق الحنين
للعاشقين
وترنيمه هاديه فى كنيسة القديسين
ولى أبوين
وانا طوافة الجوامع وسبحه فـ الزنازين
أنا الفرح الحزين
أنا الخان والهرم و الحسين
أنا مصريه زى كل المصريين
وبيسألونى قاريه لمين
قولت قاريه فى عيون الشهيد
كان جدع حر عنيد
كان يصد الظلم بجرءة من حديد
كان طلق الرصاص فى عيونه يزيد
يضحك وكأنه عيد
وقريت كمان فى وجوه العبيد
خوف شديد
وتاريخ بيحكى عن خاين مستفيد
ومستميت
حالف بحياة كل قيد فى كل إيد
ليكون عبيد
والشهيد يقول يعيد وزيد يا عبيد
وهما عبيد
وبيسألونى قاريه لمين
قولت على أسفلت الميدان قريت
ومت وعشت وحبيت
مت بس عمرى ماجريت
وعشت تحت الرصاص ورحت وجيت
وحبيت التراب وعليه إترميت
كان ميدان كبير وأحلى بيت
شوفتوا ياناس أنا فين قريت
قريت كتير فى عيون الغزاه المفسدين
أنى فيا كل الحياه للعالمين
فيا شمس ونيل على الضفين
فيا ناس تموت بكرامه ولو جعانين
فيا راجل إسمه الحاج أمين
لما بدخل أقرا كتاب المصريين
بيطمنى ويبقى خليل ويبقى أمين
شوفتوا ياناس أنا قارية لمين
قارية حكاوى المصريين
شيماء صلاح
ليست هناك تعليقات:
إرسال تعليق