شايفك دافن راسك في الرمل كأنك خدت حقك. شايف النعامة أكرم منك لأنها بتخاف وحدها وبتشتمش وتسب وتلعن في أبو أي حد دماغه مش مع دماغها تحت الرمل بتخاف باحترام. شايفك لابس قميص بياقة نظيفة عايز تحافظ عليها نظيفة وإنت بتتهم الناس بالبلطجة. مش معاك ولا هسمعلك لأنه بأيت نسخة مصغرة من جبهة الإنقاذ بس على صغير الفرق بينك وبينها إنها أدامها ميكروفونات كتير وكاميرات وزيطة وأنت مفيش أدامك غير وول الفيسبوك وتوتير عايز تثبت بيه للجميع إنك متحضر وقاري وفاهم وعندك رؤية وعندك فكر. شايفك وعارف إنت بتعمل إيه، دافن راسك في الرمل ومطلع لسانك تسب وتلعن في أبو أي حد مش زيك في أي حد نزل واعترض بالطريقة السلمية فقتلو صحبه فاستمر على السلمية فسحلوا صحبه التاني فاستمر على السلمية فقبضوا على صحبه الثالث ولما ملقاش حد حواليه يعرفه راح سأل الموجودين طلع كل واحد فيهم كان ليه 3 4 5 أصحاب إللي اتقتل وإللي اتسحل وإللي اعتقلوه وإلي خطفوه ومش عارف هو فين فقرروا يدوروا على أصحابهم بسلمية أو على الأقل يقفوا عند الباب بتاع الراجل إللي المفروض إنه مسئول عن الناس دي كلها مسئول عن الشهيد ومسئول عن المصاب وإلي اتعدوا على كرامته مسئول عن المفقود وإللي لقيوه في معسكرات التعذيب مسئول عن إللي تليفونه مليان رسايل تهديد.
ولما راحوا على باب الراجل ده دسلهم بلطجية ويحرقوا ويدمورا ويكسروا ولبسهم تهمة فقرروا إنها يبأى تهمة بتهمة وهم إللي يحرقوا وهم إللي يكسروا. قرروا أنهم يبعتوا رسالة بالنار للي ميبشوفش يمكن ياخد باله يبعتوا رسالة بشمروخ بيفرقع يمكن الأطرش يسمع إنهم يبعتوا رسالة للمحجوب ورا ألف سور وحيطة ويكسروا حتة من الحيطة إللي الراجل ده واقف وراها مستخبي يمكن يشوفهم وهم بيدوروا عليه. قرروا أنهم يلفتوا انتباهه بأي طريقة ويفهموه إنه سرق بلدهم وسرق دستورهم وسرق اسم مصر وسرق حتى أصواتهم وسرق كمان حلمهم وسرق مع كل أعز الناس عندهم. للأسف لما عملوا كل ده كنت إنت دافن راسك تحت الرمل ومش باين منها غير لسانك بينقط عليهم سم. ومع إنك مش راضي عن كل السرقة إللي إنت اتسرقتها، إلا أنك مصمم تكون الشيك المحترم الأنيق المتحضر القاري الواعي السلمي. بس على فكرة هما أكثر منك تحضرًا ووعيًا واحترامًا لأنفسهم ولمبادئهم ويلعن أبو تحضرك وشياكتك وثقافتك وأناقتك وحكمتك وعقلك لأك لو عندك ذرو ضمير مكنتش هتقول كلمة باطل ترضي بيها اللي زيك على حساب ناس بتطالب بدم وأرواح وحقوق إنت عاجز تطالب بيها. راعي ضميرك ولو مش قادر تحييهم وكبيرة عليك يعملوا إللي إنت مش قادر تعمله اسكت أحسن متتهمهم بالبلطجة.
ليست هناك تعليقات:
إرسال تعليق