إنسانية منزوعة العبط

أيه يعني، شوية دم يطرطشوا عالأرض والحيطان في ‫#‏رابعة‬ والجيزة بعدها كل شيء هيبأى تمام. عادي مفيش مشكلة خالص. أصل العيب مش على إللي هقتل لأنه ليه مبرر وكل الناس معاه، العيب بأه على إللي رضيوا يعملوا نفسهم دروع بشرية لعالم أنجاس وتجار دين. والعيب الأكبر بأه على إللي أطلق أيدين العالم القذرة دي في الشارع المصري عشان يغسلوا مخهم بجاية من السادات وحتى خلع ‫#‏المخلوع‬. والعيب برضه على إللي أدى ‫#‏مصر‬ هدية للإخوان وجري بجرايمه وإللي لسه محمي ومتحصن بمؤسسته ‫#‏طنطاوي‬ و ‫#‏عنان‬ إللي عاملين فيها أبطال دلوقتي ومعاهم القلادات.

ومحدش يجيب المسلسل من الحلقة الأخيرة بتاعت ‫#‏السيسي‬ ويقول هو إللي قتل الناس عند الحرس الجمهوري وفي طريق النصر ومش عارف فين. هو ورجالته بيحموك من الإرهاب وشعبك كله راضي بكده. وبرضه محدش يقعد يعيط ويقول أصل حكم العسكر رجع والكلام الجامدد ده لأنك لو شايف أن حكم العسكر رجع وقاعد ساكت تبأى مش راجل ولو خايف يرجع ومتقدرش عليه برضه مش راجل لأننا ببساطة اضطرينا ميليشات طنطاوي تسلم الحكم للإخوان وتجري وعندنا قوات مسلحة مكنش ممكن تكمل وتوصل لمرحلة سوريا وعلشان كده طنطاوي خد شركاه الـ 18 وخلع. 

إللي في أيدينا دلوقتي قيادة أعلنت أنها ملهاش علاقة بالحكم ورئيس مدني، أي نعم مستخبي، بس بكره بعد الحرب متخلص هيظهر تاني، إللي هيعمل إللي وعد بيه أهلًا وسهلًا وإللي مش هيعمل كده هيروح جنب‫#‏مرسي‬ ومش هيصعب علينا. ولكل مرحلة ضحايا ومحدش يقنعني أن موقف الشاب الإخواني إللي بيقف أدام الأمن أو الجيش دلوقتي وموقف إللي وقف في التحرير وسله بيقف واحد لأنه بيدافع عن شخص وجماعة مش بلد ومقدرش أفرق بينه وبين البلطجي إللي عمل موقعة الجمل وإللي هاجم الثوار في كل مكان لصالح المخلوع. وأعتقد أننا في غنى عن طرطشة الدم وممكن الداخلية والجيش يستخدموا المية والغاز في التفريق، بس ده إا متضربش عليهم رصاص حي. ومعنى الكلام أن فيه 100 طريقة تعرف تتعامل بيها مع التظاهرات والمواجهات والاشتباكات. 

 أنا لا أستحل دم أحد، ولكني على استعداد أن أكون من بين الشباب إللي هتخسرهم مصر في الحرب على الإرهاب المتمثل في جماعة عندها القدرة على الاحتلال والتحصن وعزل أحياء بأكملها عن مصر ولديها سلاح شفته بعيني ولديها شباب مستعدون للتحول إلى مسلحين تسليح عالي في دقائق. ولديها نساء شفتهم بعيني وهم في ميدان الجيزة بيحرضوا الناس عشان ينزلوا يقفوا مع الإخوان وبيقولوهلهم انزلوا مع أخواتكم عشان الإخوان بيضربوا بالنار في وقت كان فيه ميدان النهضة هادي جدًا ومفيهوش غير صوت زفلط حجازي بينعر في المايك. 

لا لاستحلال الدماء وكل الدم المصري حرام في مقابلها لا للإرهاب والدم الحرام عمره مهيكون دم المعتدي لأن ربنا سبحانه وتعالى قال في كتابه الحكيم "فمن اعتدى عليكم فاعتدوا عليه بمثل ما اعتدى عليكم واتقوا الله واعلموا أن اله مع المتقين" صدق الله العظيم.

هي دي الإنسانية، بس مش مخلوطة بعبط ولا مغيبة المنطقة.