يا شعب مصر محمي
ومحصن يا شعب ربنا يحفظك من شر الدجالين إللي صورولنا إن عندنا رئيس اسمه محمد مرسي
ورئيس وزراء اسمه هشام قنديل. وقال إيه!!! عندنا مجلس شورى بيطلع قوانين. وربنا يجازيه
إللي عمل العمل ده وحطه في حجاب ورماه في نهر النيل وطبعًا كلنا بنشرب منه خلانا
نتخيل إن الثورة خلصت وآن الأوان لبناء المؤسسات وانتخاب مجلس نواب وإننا جاهزين
كمان نكون دولة قانون وكمان هيألنا ووهمنا بإننا عندنا حرية إعلام واستقلالية
قضاء. وقال أيه كمان عندنا وزير عدل بيطلع مقترحات قوانين ويعلنها على مجلس الشورى
إللي هو أصلًا جزء من التهيؤات إللي بيصورهالنا العمل السفلي إللي اترمى في النيل وكمان بيقول هما إللي قالولي قول إن الجندي مات في حادثة عربية.
الحل الوحيد إننا نعمل حاجة من اتنين، نبطل نشرب مية النيل عشان العمل ميأثرش فيها ونشرب مية معدنية ودا حل مش عملي لأن مش
هيقدر عليه ناس كتير. أو الحل التاني إننا كلنا نلبس خرزة زرقا أو إللي مكسوف
يلبسها يحطها في جيبه وكل منطقة تجيب عربية نص نقل وتحط فيها سماعات من بتاعة
الواد حماصة بتاع الدي جي وتشغل آية الكرسي وتطلع بيها تقف شوية أدام الاتحادية
وشوية أدام مجلس الشوري وشوية أدام مقر الوزارة وغيرها من الوزارات إللي العمل
السفلي ميهيا لنا إن فيها مسئولين حقيقيين مع إن هم في الحقيقة أوهام.
ليست هناك تعليقات:
إرسال تعليق